எதே… ஜெயம் ரவியா.? வில்லன் கேரக்டரா.? – ரஜினி ஸ்டைலில் பேசி அசத்திய சிவகார்த்திகேயன்.!

நடிகர் சிவகார்த்திகேயன் நடிப்பில் இயக்குநர் சுதா கொங்கரா இயக்கத்தில் உருவாகியுள்ள புதிய திரைப்படமான ‘பராசக்தி’ தற்போது ரசிகர்களிடையே மிகப்பெரிய எதிர்பார்ப்பை ஏற்படுத்தியுள்ளது.

இந்த படத்தில் சிவகார்த்திகேயனுடன் அதர்வா, ஜெயம் ரவி, ஸ்ரீ லீலா ஆகியோர் முக்கிய கதாபாத்திரங்களில் நடித்துள்ளனர். டான் பிக்சர்ஸ் நிறுவனம் சார்பில் ஆகாஷ் பாஸ்கரன் இப்படத்தை தயாரித்துள்ளார். மேலும், இப்படத்திற்கு ஜி.வி.பிரகாஷ் குமார் இசையமைத்துள்ளார்.

வலுவான தொழில்நுட்ப குழுவும், நட்சத்திர பட்டாளமும் இணைந்திருப்பதால், ‘பராசக்தி’ இந்த ஆண்டின் முக்கியமான படங்களில் ஒன்றாக பார்க்கப்படுகிறது.

நேற்று ‘பராசக்தி’ படத்தின் ட்ரெய்லர் அதிகாரபூர்வமாக வெளியிடப்பட்டது. ட்ரெய்லர் வெளியான சில மணி நேரங்களிலேயே, சமூக வலைத்தளங்களில் வேகமாக வைரலானது. சிவகார்த்திகேயன் இதுவரை நடித்திராத ஒரு தீவிரமான கதாபாத்திரத்தில் தோன்றுவது ரசிகர்களை ஆச்சரியத்தில் ஆழ்த்தியுள்ளது.

ட்ரெய்லர் வெளியான அதே நாளில், ‘பராசக்தி’ படத்தின் இசை வெளியீட்டு விழா தொலைக்காட்சியில் சிறப்பாக ஒளிபரப்பப்பட்டது. இந்த விழாவில் படக்குழுவினர் அனைவரும் கலந்து கொண்டு தங்களது அனுபவங்களையும், நினைவுகளையும் ரசிகர்களுடன் பகிர்ந்து கொண்டனர்.

விழாவின் போது பேசிய சிவகார்த்திகேயன், தனது இயல்பான நகைச்சுவை மற்றும் எளிமையான பேச்சு மூலம் ரசிகர்களை கவர்ந்தார். அதே நேரத்தில், அவர் பேசிய ஒரு குறிப்பிட்ட உரையாடல் தற்போது சமூக வலைத்தளங்களில் வைரலாகி வருகிறது.

இசை வெளியீட்டு விழாவில் பேசும்போது, சிவகார்த்திகேயன், “எதே… ஜெயம் ரவியா? வில்லன் கேரக்டரா? ஒத்துக்கிட்டாரா?” என்று பேசினார். இந்த உரையாடல், ரசிகர்களுக்கு உடனடியாக சூப்பர் ஸ்டார் ரஜினிகாந்தின் பேச்சை நினைவூட்டியது.

இதற்கு காரணம், சமீபத்தில் நடைபெற்ற ‘கூலி’ திரைப்படத்தின் இசை வெளியீட்டு விழாவில், ரஜினிகாந்த், “எதே… நாகர்ஜுனாவா? வில்லன் கேரக்டரா? ஒத்துக்கிட்டாரா?” என்று கூறியிருந்தார். அந்த பேச்சு அப்போது சமூக வலைத்தளங்களில் பெரும் அளவில் வைரலானது.

அதே பாணியில், அதே டோனில் சிவகார்த்திகேயன் பேசியது ரசிகர்களிடையே பெரும் வரவேற்பை பெற்றுள்ளது. தற்போது, ரஜினியின் பேச்சு மற்றும் சிவகார்த்திகேயனின் பேச்சை ஒப்பிட்டு வீடியோக்கள், மீம்கள், ரீல்ஸ் ஆகியவை சமூக வலைத்தளங்களில் பகிரப்பட்டு வருகின்றன.