'வீர தீர சூரன்' திரைப்படத்தின் வெற்றிக்குப் பிறகு நடிகர் விக்ரம் தனது அடுத்த பிரம்மாண்டமான படைப்பான 'சியான் 63' படத்தில் முழு கவனம் செலுத்தி வருகிறார். விக்ரமின் 63-வது திரைப்படமாக உருவாகி வரும் இந்தப் படத்தை, 'இருமுகன்' படத்தின் மூலம் ரசிகர்களின் கவனத்தை ஈர்த்த இயக்குநர் ஆனந்த் ஷங்கர் இயக்குகிறார்.
சத்யஜோதி பிலிம்ஸ் நிறுவனம் தயாரித்து வரும் இப்படத்திற்கு தற்போது 'சியான் 63' என்ற தற்காலிக தலைப்பு வைக்கப்பட்டுள்ளது. இசையமைப்பாளர் சந்தோஷ் நாராயணன் இசையமைத்து வருவதால், படத்தின் இசைக்கும் ரசிகர்கள் மத்தியில் அதிக எதிர்பார்ப்பு உருவாகியுள்ளது.
இந்தப் படத்தின் மூலம் மலையாள நடிகை ரியா ஷிபு தமிழ் சினிமாவில் கதாநாயகியாக அறிமுகமாகிறார். மலையாளத்தில் 'சர்வம் மாயா' படத்தின் மூலம் கவனம் பெற்ற அவர், தற்போது விக்ரமுக்கு ஜோடியாக நடித்து வருகிறார். மேலும் எம்.எஸ். பாஸ்கர், ஊர்வசி, சம்யுக்தா ஹெக்டே, ஷம்மி திலகன் உள்ளிட்ட அனுபவம் மிக்க நடிகர்களும் முக்கிய கதாபாத்திரங்களில் இடம்பெற்றுள்ளனர். அத்துடன், ரியா ஷிபு 'வீர தீர சூரன்' படத்தின் தயாரிப்பாளர் ஷிபு தமீன்ஸின் மகளும் ஆவார்.
எப்போதும் தனது கதாபாத்திரங்களுக்காக உடல் தோற்றத்தை மாற்றிக் கொள்ளும் விக்ரம், இந்தப் படத்திற்காகவும் கட்டுமஸ்தான உடலமைப்புடன் புதிய லுக்கில் களமிறங்கியுள்ளார். சமீபத்தில் வெளியான அவரது புதிய தோற்றம் சமூக வலைத்தளங்களில் வைரலாகி, ரசிகர்களின் எதிர்பார்ப்பை மேலும் அதிகரித்துள்ளது. கதாபாத்திரத்திற்காக அவர் எடுத்துள்ள அர்ப்பணிப்பு மீண்டும் ஒருமுறை பாராட்டைப் பெற்றுள்ளது.
சமீபத்தில் படத்தின் பூஜை நடைபெற்ற நிலையில், தற்போது முதற்கட்ட படப்பிடிப்பு வெற்றிகரமாக நிறைவடைந்துள்ளதாக படக்குழுவுக்கு நெருக்கமான வட்டாரங்கள் தெரிவிக்கின்றன. இதையடுத்து, இரண்டாம் கட்ட படப்பிடிப்பை விரைவில் தொடங்க படக்குழு தீவிரமாகத் தயாராகி வருகிறது. விக்ரம் - ஆனந்த் ஷங்கர் கூட்டணி மீண்டும் இணைந்துள்ளதால், 'சியான் 63' ரசிகர்களின் மிகுந்த எதிர்பார்ப்புக்குரிய திரைப்படங்களில் ஒன்றாக உருவெடுத்து வருகிறது.
.png)
.png)
Listen News!