தெலுங்கில் ஹிட் அடித்த 'மிராய்'..!இரண்டாம் நாளில் இத்தனை கோடி வசூலா?

2011 ஆம் ஆண்டு சாம்பி ரெட்டி திரைப்படத்தின் மூலம் குழந்தை நடிகராக அறிமுகமான தேஜா சஜ்ஜா, தற்போது தெலுங்கு சினிமாவின் முன்னணி நடிகர்களில் ஒருவராக உருவெடுத்துள்ளார். அவரது சமீபத்திய படம் மிராய், ரசிகர்களிடையே நல்ல வரவேற்பைப் பெற்றதுடன், வெளியான சில நாட்களிலேயே வசூலில் புதிய சாதனைகளை நிகழ்த்தி வருகிறது.

ஒளிப்பதிவாளர் மற்றும் இயக்குநராக அறியப்படும் கார்த்திக் கட்டாமானேனி இயக்கியுள்ள மிராய் திரைப்படத்தை, பீபில் மீடியா ஃபேக்டரி நிறுவனம் மிகுந்த உழைப்புடன் தயாரித்துள்ளது. சயன்ஸ் ஃபிக்ஷன் மற்றும் ஆக்ஷனை மையமாகக் கொண்ட இந்த திரைப்படம், வித்தியாசமான கதைக்களத்தால் அனைத்து தரப்பினரும் பாராட்டும் படமாக மாறியுள்ளது.

இந்நிலையில், படக்குழுவினர் அதிகாரப்பூர்வமாக வெளியிட்ட தகவலின்படி, திரைப்படம் இரண்டாம் நாளில் மட்டும் ரூ. 55.60 கோடி வசூலித்து மிகப்பெரிய வெற்றியைப் பதிவு செய்துள்ளது. இந்த எண்ணிக்கை, தெலுங்கு சினிமாவின் வளர்ந்துவரும் கதாநாயகர்களில் ஒருவராக உள்ள தேஜா சஜ்ஜாவுக்கு மிகுந்த ஊக்கமாக உள்ளதாக கூறப்படுகிறது.

படத்தில், மனோஜ் மஞ்சு வில்லனாக அதிரடியாக நடித்துள்ளதுடன், ரித்திகா நாயக் கதாநாயகியாக தேஜாவுக்கு ஜோடியாக நடித்துள்ளார். ரசிகர்கள் மற்றும் விமர்சகர்களிடையே நல்ல விமர்சனங்களை பெற்றுள்ள மிராய், எதிர்காலத்திலும் மேலும் அதிக வசூல்களுடன் தொடரும் என எதிர்பார்க்கப்படுகிறது.

மேலும் சினிமா செய்திகளுக்கு இங்கே அழுத்தவும்

முக்கிய செய்திகள் பிரபலமானவை