இந்திய திரையுலகின் தலைசிறந்த பின்னணிப் பாடகிகளில் ஒருவராகப் போற்றப்பட்ட எஸ். ஜானகி காலமானார். உடல்நலக் குறைவு காரணமாக மைசூருவில் உள்ள அப்போலோ மருத்துவமனையில் சிகிச்சை பெற்று வந்த நிலையில், மூச்சுத் திணறல் தீவிரமடைந்து அவர் உயிரிழந்ததாக குடும்பத்தினர் தெரிவித்துள்ளனர். அவரது மறைவு செய்தி இந்திய இசை உலகையே ஆழ்ந்த துயரத்தில் ஆழ்த்தியுள்ளது.
88 வயதான எஸ். ஜானகி, கடந்த சில மாதங்களாக வயது முதிர்வு தொடர்பான உடல்நலப் பிரச்சினைகளால் அவதிப்பட்டு வந்தார். இந்த ஆண்டின் தொடக்கத்தில் மருத்துவமனையில் அனுமதிக்கப்பட்டு சிகிச்சை பெற்று வீடு திரும்பியிருந்தார். அதன் பின்னர் அவரது உடல்நிலை குறித்து சமூக வலைதளங்களில் பல்வேறு வதந்திகள் பரவிய நிலையில், தற்போது அவரது மறைவு அதிகாரப்பூர்வமாக உறுதி செய்யப்பட்டுள்ளது.
1938ஆம் ஆண்டு ஆந்திரப் பிரதேசத்தில் பிறந்த எஸ். ஜானகி, சிறு வயதிலிருந்தே இசையில் அபாரமான திறமையை வெளிப்படுத்தினார். 1957ஆம் ஆண்டு வெளியான "விதியின் விளையாட்டு" திரைப்படத்தின் மூலம் பின்னணிப் பாடகியாக அறிமுகமான அவர், பின்னர் இந்திய திரையிசையின் தவிர்க்க முடியாத குரலாக உயர்ந்தார்.
தமிழ், தெலுங்கு, மலையாளம், கன்னடம், இந்தி உள்ளிட்ட 17க்கும் மேற்பட்ட மொழிகளில் சுமார் 48 ஆயிரத்துக்கும் மேற்பட்ட பாடல்களை பாடிய சாதனை அவருக்கு சொந்தமானது. குழந்தையின் குரல் முதல் முதிய பெண்ணின் குரல் வரை உணர்ச்சிக்கேற்ற வகையில் குரலை மாற்றிப் பாடும் அபூர்வ திறமை காரணமாக, ரசிகர்களும் இசையமைப்பாளர்களும் அவரை தனித்துவமான கலைஞராக மதித்தனர்.
எஸ். ஜானகி தனது அபாரமான குரல் திறனுக்காக நான்கு முறை தேசிய திரைப்பட விருதை வென்றுள்ளார்.
அதில் தமிழில் வெளியான "செந்தூரப்பூவே செந்தூரப்பூவே" பாடலும், "இஞ்சி இடுப்பழகா" பாடலும் பெரும் வரவேற்பைப் பெற்றதோடு தேசிய அளவிலும் கவுரவிக்கப்பட்டன. மேலும் தெலுங்கு மற்றும் மலையாள மொழிப் பாடல்களுக்காகவும் தேசிய விருதுகளை பெற்றார்.
அதுமட்டுமின்றி பல மாநில அரசுகளின் உயரிய விருதுகள், தமிழ்நாடு அரசின் கலைமாமணி உள்ளிட்ட ஏராளமான பாராட்டுகளும் அவரை வந்தடைந்தன.
எம்.எஸ். விஸ்வநாதன், கே.வி. மகாதேவன், வி. குமார், சங்கர்–கணேஷ், இளையராஜா போன்ற இசை ஜாம்பவான்களுடன் இணைந்து எண்ணற்ற மறக்க முடியாத பாடல்களை பாடியுள்ளார்.
அதன்பின்னரும் ஏ.ஆர். ரஹ்மான், தேவா, வித்யாசாகர், யுவன் சங்கர் ராஜா, ஹாரிஸ் ஜெயராஜ் உள்ளிட்ட புதிய தலைமுறை இசையமைப்பாளர்களுடனும் இணைந்து தனது குரலால் ரசிகர்களை கவர்ந்தார்.
அவரது பாடல்கள் பல தலைமுறைகளாக ரசிகர்களின் மனதில் நிலைத்து நிற்கும் இசைப் பொக்கிஷங்களாகவே கருதப்படுகின்றன.
எஸ். ஜானகியின் குடும்பத்திலும் கடந்த சில மாதங்களாக சோகமான நிகழ்வுகள் இடம்பெற்றிருந்தன. அவரது ஒரே மகனான முரளி கிருஷ்ணா, இந்த ஆண்டு ஜனவரி மாதம் உயிரிழந்திருந்தார். அந்த இழப்பிலிருந்து முழுமையாக மீளாத நிலையில், தற்போது எஸ். ஜானகியின் மறைவு குடும்பத்தினருக்கும் ரசிகர்களுக்கும் மேலும் ஒரு பேரிழப்பாக அமைந்துள்ளது.
எஸ். ஜானகியின் மறைவு செய்தி வெளியானதும் திரைப்பட நட்சத்திரங்கள், இசையமைப்பாளர்கள், பாடகர்கள் மற்றும் அரசியல் தலைவர்கள் உள்ளிட்ட பலரும் ஆழ்ந்த இரங்கலை தெரிவித்துள்ளனர்.
அவரது குரல் இந்திய இசை வரலாற்றில் என்றென்றும் ஒலித்துக்கொண்டே இருக்கும் என்றும், அவர் பாடிய ஆயிரக்கணக்கான பாடல்கள் தலைமுறைகளைத் தாண்டி ரசிகர்களின் மனங்களில் வாழும் என்றும் பலரும் புகழஞ்சலி செலுத்தி வருகின்றனர்.
ஒரு பாடகி மட்டுமல்ல, இந்திய திரையிசையின் உணர்வுகளுக்கு உயிர் கொடுத்த குரலாக எஸ். ஜானகி நினைவுகூரப்படுகிறார். பல தசாப்தங்களாக ரசிகர்களின் இதயங்களில் ஒலித்த அந்த இனிய குரல் இன்று மௌனமானாலும், அவர் பாடிய ஆயிரக்கணக்கான பாடல்கள் காலத்தைக் கடந்த இசைச் சின்னங்களாக என்றும் நிலைத்திருக்கும்.
.png)
.png)
Listen News!