‘ஜன நாயகன்’ வருகை... தமிழ் சினிமாவின் வெளியீட்டு கணக்கையே மாற்றுகிறதா?

தமிழ் சினிமாவில் இந்த மாதத்தின் மிகப்பெரிய எதிர்பார்ப்பாக மாறியுள்ள முதல்வர் விஜய்யின் ஜன நாயகன் திரைப்படம், திரையுலகின் வெளியீட்டு அட்டவணையையே மாற்றும் சூழலை உருவாக்கியுள்ளதாக தகவல்கள் வெளியாகியுள்ளன.

விஜய்யின் திரை வாழ்க்கையின் இறுதித் திரைப்படமாகக் கருதப்படும் ‘ஜன நாயகன்’ திரைப்படம் இந்த மாத இறுதிக்குள் வெளியாகும் என எதிர்பார்க்கப்படுகிறது.

இதனால், ஏற்கெனவே ஜூலை மாதத்தில் வெளியீட்டைத் திட்டமிட்டிருந்த சில திரைப்படங்களின் தயாரிப்பாளர்கள், தங்களது படங்களின் வெளியீட்டு தேதியை மாற்றுவது குறித்து ஆலோசித்து வருவதாக சினிமா வட்டாரங்கள் தெரிவிக்கின்றன.

தகவல்களின்படி, ‘ஜன நாயகன்’ திரைப்படத்தை தணிக்கைக் குழு (Censor Board) அண்மையில் பார்வையிட்டதாகவும், படத்திற்கு 'A' சான்றிதழ் வழங்கப்பட்டுள்ளதாகவும் கூறப்படுகிறது. மேலும் சான்றிதழ் தொடர்பான மேலதிக தாமதங்களைத் தவிர்க்கும் வகையில், தயாரிப்பு நிறுவனமும் அந்த முடிவை ஏற்றுக்கொண்டதாக தகவல்கள் வெளியாகியுள்ளன.

இதையடுத்து, திரைப்படத்தை ஜூலை 16 அல்லது ஜூலை 23 ஆகிய தேதிகளில் ஒன்றில் வெளியிட தயாரிப்புக் குழு திட்டமிட்டு வருவதாகவும் கூறப்படுகிறது. இருப்பினும், இதுகுறித்த அதிகாரப்பூர்வ அறிவிப்பு இதுவரை வெளியாகவில்லை.

முதல்வராக பொறுப்பேற்ற பிறகு வெளியாகும் விஜய்யின் முதல் திரைப்படம் மட்டுமல்லாமல், நடிகராக அவரது கடைசிப் படமாகவும் இது கருதப்படுவதால், ரசிகர்கள் மத்தியில் திரைப்படத்தின் மீதான எதிர்பார்ப்பு உச்சத்தை எட்டியுள்ளது. திரையரங்குகளில் பிரம்மாண்ட கொண்டாட்டங்களுக்கு ரசிகர்கள் தயாராகி வருவதாகவும் கூறப்படுகிறது.

இந்நிலையில், ‘ஜன நாயகன்’ வெளியீடு காரணமாக அதே காலகட்டத்தில் வெளியாகவிருந்த பல திரைப்படங்களும் தங்களது வெளியீட்டு தேதிகளை மறுபரிசீலனை செய்து வருவதாக தகவல்கள் தெரிவிக்கின்றன.

குறிப்பாக, முதல்வர் விஜய்யின் மகன் ஜேசன் சஞ்சய் இயக்கத்தில் உருவாகியுள்ள சிக்மா திரைப்படம் தற்போது ஜூலை 31 ஆம் தேதி வெளியாகும் என அறிவிக்கப்பட்டுள்ளது.

எனினும், ‘ஜன நாயகன்’ திரைப்படத்தின் வெளியீட்டு தாக்கத்தை கருத்தில் கொண்டு, அந்தப் படத்தின் வெளியீட்டுத் தேதியிலும் மாற்றம் செய்யப்படலாம் என சினிமா வட்டாரங்களில் பேசப்பட்டு வருகிறது.

விஜய்யின் திரைப்படங்கள் வெளியாகும் ஒவ்வொரு முறையும் தமிழ்த் திரைப்படத் துறையில் வெளியீட்டு அட்டவணையில் மாற்றங்கள் ஏற்படுவது வழக்கமான ஒன்றாக இருந்தாலும், இந்த முறை அவரது இறுதித் திரைப்படம் என்ற உணர்வு காரணமாக ‘ஜன நாயகன்’ படத்தைச் சுற்றியுள்ள எதிர்பார்ப்பு மேலும் அதிகரித்துள்ளது.

இதன் காரணமாக, வரும் நாட்களில் பல திரைப்படங்களின் வெளியீட்டு தேதிகளில் மாற்றம் தொடர்பான அதிகாரப்பூர்வ அறிவிப்புகள் வெளியாகலாம் என எதிர்பார்க்கப்படுகிறது.

மேலும் சினிமா செய்திகளுக்கு இங்கே அழுத்தவும்

முக்கிய செய்திகள் பிரபலமானவை