தமிழக அரசியலில் புதிய அத்தியாயத்தை தொடர்ந்து வரும் முதலமைச்சரும், தமிழக வெற்றிக் கழகத்தின் தலைவருமான விஜய், தினமும் பல்வேறு தரப்பினரின் வாழ்த்துகளையும் மரியாதைகளையும் பெற்று வருகிறார். அரசியல் தலைவர்கள், சமூக அமைப்புகளின் பிரதிநிதிகள் மட்டுமல்லாமல், திரையுலகைச் சேர்ந்த பலரும் அவரை நேரில் சந்தித்து வாழ்த்து தெரிவித்து வருகின்றனர்.
அந்த வரிசையில், நடிகரும் இயக்குநருமான பார்த்திபன் அண்மையில் முதலமைச்சர் விஜய்யை நேரில் சந்தித்தார். இந்த சந்திப்பு வழக்கமான மரியாதை சந்திப்பாக இல்லாமல், தனது தனித்துவமான கலை அணுகுமுறையால் அனைவரின் கவனத்தையும் ஈர்த்துள்ளது.
சந்திப்பின் போது பார்த்திபன், விஜய்க்கு ஒரு சிறப்பு ஓவியத்தை பரிசாக வழங்கினார். அந்த ஓவியத்தில் விஜய் ஒரு பேரரசர் போன்ற கம்பீரமான தோற்றத்தில் அரியணைக்கு அருகில் நிற்பது போல சித்தரிக்கப்பட்டிருந்தார். அதிகாரம், பொறுப்பு மற்றும் தலைமைத்துவத்தை குறிக்கும் வகையில் வடிவமைக்கப்பட்டிருந்த அந்த ஓவியம், அங்கு இருந்தவர்களின் கவனத்தை வெகுவாக கவர்ந்தது.
இதில் மேலும் சிறப்பு சேர்த்தது பார்த்திபன் எழுதிய கவிதை. தனது வழக்கமான வார்த்தை விளையாட்டு மற்றும் கற்பனை நயத்துடன் அவர் எழுதியிருந்த வரிகள், விஜய்யின் திரைப்பயணத்திலிருந்து அரசியல் தலைமையிலான பயணத்தை சுட்டிக்காட்டும் வகையில் அமைந்திருந்தன.
“சினிமாயணம் to CM ஆசனம்” என தொடங்கிய அந்த கவிதையில், நல்லாட்சியை வழங்கும் தலைவராக விஜய்யை வர்ணித்திருந்தார். மேலும், ‘விஜய் பேரரசர்’, ‘அரியணையை அலங்கரிக்கும் முதல்வர்’, ‘உலக அரசியல் அதிர்WIN’ போன்ற சொற்கள் மூலம் தனது வாழ்த்துகளையும் நம்பிக்கையையும் பதிவு செய்திருந்தார்.
திரையுலகில் எப்போதும் வித்தியாசமான சிந்தனைகளுக்காக அறியப்படும் பார்த்திபன், இந்த முறை ஓவியமும் கவிதையும் இணைந்த ஒரு கலைநயமிக்க பரிசின் மூலம் தனது வாழ்த்துகளை வெளிப்படுத்தியுள்ளார். இந்த சந்திப்பின் புகைப்படங்களும், ஓவியமும் தற்போது சமூக வலைதளங்களில் ரசிகர்களிடையே அதிகம் பகிரப்பட்டு வருகின்றன.
சினிமா உலகின் முன்னணி நட்சத்திரமாக இருந்து அரசியல் தலைவராக உயர்ந்துள்ள விஜய்க்கு, திரையுலக நண்பர்கள் தொடர்ந்து ஆதரவும் வாழ்த்துகளும் தெரிவித்து வரும் நிலையில், பார்த்திபனின் இந்த தனித்துவமான பரிசு தற்போது அரசியல் மற்றும் சினிமா வட்டாரங்களில் பேசுபொருளாக மாறியுள்ளது.
.png)
.png)
Listen News!