தமிழ் திரையுலகில் தனித்த இசை பாணியால் ரசிகர்களை கவர்ந்தவர் ஹிப் ஹாப் தமிழா ஆதி. முதலில் தனி இசை பாடல்கள் மூலம் பிரபலமான இவர், பின்னர் விஜய் ஆண்டனியின் ‘ஆம்பள’ திரைப்படத்தின் மூலம் இசையமைப்பாளராக சினிமாவில் அறிமுகமானார்.
அதனைத் தொடர்ந்து பல முன்னணி படங்களுக்கு இசையமைத்து வந்த ஹிப் ஹாப் தமிழா ஆதி, ‘மீசைய முறுக்கு’ திரைப்படத்தின் மூலம் நடிகராகவும் களமிறங்கி ரசிகர்களிடையே நல்ல வரவேற்பைப் பெற்றார். இதைத் தாண்டி, சமூகமும் வரலாறும் சார்ந்த ஆவணப்படங்களிலும் அவர் கவனம் செலுத்தி வருகிறார்.
ஹிப் ஹாப் தமிழாவின் ‘தமிழன்டா’ இயக்கத்தின் கீழ், 2019 ஆம் ஆண்டு ‘தமிழி’ என்ற ஆவணப்பட இணையத் தொடர் வெளியிடப்பட்டது. சுமார் 20,000 கிலோமீட்டர் பயணம் செய்து, பண்டைய தமிழ் கல்வெட்டுகள் முதல் அசோகர் கல்வெட்டுகள் வரை பல வரலாற்றுச் சான்றுகளை ஆராய்ந்து உருவாக்கப்பட்ட இந்த தொடர் பெரும் பாராட்டைப் பெற்றது.
இதைத் தொடர்ந்து, அதே ‘தமிழன்டா’ இயக்கத்தின் அடுத்த முயற்சியாக ‘பொருநை’ என்ற புதிய ஆவணப்படம் உருவாக்கப்பட்டுள்ளது.
தாமிரபரணி என அழைக்கப்படும் பொருநை நதிக்கரையில் 2020–2021 ஆண்டுகளில் நடைபெற்ற அகழாய்வுப் பணிகள் முழுமையாக பதிவு செய்யப்பட்டு இந்த ஆவணப்படம் தயாரிக்கப்பட்டுள்ளது.
இந்த படத்தை ஹிப் ஹாப் தமிழா எண்டர்டெயின்மெண்ட் நிறுவனம் தயாரித்துள்ளது. பிரதீப் குமார் மற்றும் இளங்கோ சம்பத்குமார் இணைந்து இயக்கியுள்ளனர்.
இந்த ‘பொருநை’ ஆவணப்படம் தற்போது பல சர்வதேச திரைப்பட விழாக்களுக்கு அனுப்பப்பட்டுள்ளது. அதில் குறிப்பிடத்தக்கதாக, துருக்கியில் நடைபெறும் Foca International Archaeology & Cultural Heritage Film Festival-இல் இந்த படம் தேர்வாகியுள்ளது.
வரும் அக்டோபர் மாதத்தில் நடைபெறவுள்ள இந்த விழாவில் திரையிடப்படவுள்ள முதல் தமிழ் ஆவணப்படம் ‘பொருநை’ என்பது குறிப்பிடத்தக்க சாதனையாகும்.
இந்த ஆவணப்படம் தமிழின் வரலாற்று அடையாளங்களை உலகளவில் எடுத்துச் செல்லும் முக்கிய முயற்சியாக பார்க்கப்படுகிறது.
.png)
.png)
Listen News!