தமிழ் சினிமாவில் வித்தியாசமான கதாபாத்திரங்களையும், பல்வேறு கதைக்களங்களையும் தேர்வு செய்து நடித்து வரும் நடிகர்களில் முக்கியமானவர் ஆர்யா. இவர் ஆக்ஷன், காதல், விளையாட்டு, திரில்லர் என பல்வேறு வகை படங்களில் தனது திறமையை வெளிப்படுத்தி வருகிறார்.
சமீபத்தில் வெளியான 'மிஸ்டர் எக்ஸ்' திரைப்படம் எதிர்பார்த்த அளவிலான வரவேற்பைப் பெறாத நிலையில், தனது அடுத்த படத்தின் மூலம் ரசிகர்களின் கவனத்தை மீண்டும் ஈர்க்க ஆர்யா முயற்சி செய்து வருகிறார். அந்த வரிசையில் உருவாகியுள்ள திரைப்படம்தான் 'அனந்தன் காடு'.
'ரன் பேபி ரன்' திரைப்படத்தின் மூலம் கவனம் பெற்ற இயக்குநர் ஜியென் கிருஷ்ணகுமார் இயக்கியுள்ள இந்த படம், மர்மம் மற்றும் சஸ்பென்ஸ் கலந்த திரில்லர் கதைக்களத்தில் உருவாகியுள்ளதாக கூறப்படுகிறது.
குறிப்பாக சமீபத்தில் பெரும் வரவேற்பைப் பெற்ற 'எம்புரான்' திரைப்படத்திற்கு கதை மற்றும் திரைக்கதை எழுதிய முரளி கோபி, இந்த படத்திற்கும் கதை எழுதியிருப்பது ரசிகர்களின் எதிர்பார்ப்பை மேலும் அதிகரித்துள்ளது.
மினி ஸ்டூடியோஸ் சார்பில் வினோத் குமார் தயாரித்துள்ள இந்த திரைப்படத்திற்கு, 'காந்தாரா' படத்தின் மூலம் இந்திய அளவில் கவனம் பெற்ற இசையமைப்பாளர் அக்னிஷ் லோக்நாத் இசையமைத்துள்ளார். மேலும் நிகிலா விமல், ரெஜினா கசாண்ட்ரா, சுனில், இந்திரன்ஸ் உள்ளிட்ட பலர் முக்கிய கதாபாத்திரங்களில் நடித்துள்ளனர்.
ஏற்கனவே வெளியான படத்தின் ஃபர்ஸ்ட் லுக் போஸ்டர் மற்றும் டைட்டில் டீசர் ரசிகர்களிடையே நல்ல வரவேற்பைப் பெற்றிருந்த நிலையில், தற்போது வெளியாகியுள்ள புதிய டீசர் இணையத்தில் வைரலாகி வருகிறது. டீசரில் இடம்பெற்றுள்ள காட்சிகள், காட்டை மையமாகக் கொண்ட மர்ம சம்பவங்கள் மற்றும் பரபரப்பான திரைக்கதையை சுட்டிக்காட்டுவதாக ரசிகர்கள் கருத்து தெரிவித்து வருகின்றனர்.
இந்நிலையில், 'அனந்தன் காடு' திரைப்படம் வரும் 25ஆம் தேதி உலகம் முழுவதும் திரையரங்குகளில் வெளியாகும் என படக்குழு அதிகாரப்பூர்வமாக அறிவித்துள்ளது. மேலும் ஆர்யாவுக்கு இந்த படம் முக்கியமான வெற்றிப் படமாக அமையுமா என்ற எதிர்பார்ப்பு ரசிகர்கள் மத்தியில் எழுந்துள்ளது.
காடு, மர்மம், சஸ்பென்ஸ் மற்றும் அதிரடி அம்சங்களை ஒருங்கே கொண்டுள்ள 'அனந்தன் காடு', இந்த மாதம் வெளியாகும் முக்கிய திரைப்படங்களில் ஒன்றாக மாறியுள்ளது. ரசிகர்களின் எதிர்பார்ப்பை படம் பூர்த்தி செய்யுமா என்பதை பொறுத்திருந்து பார்க்க வேண்டும்.
.png)
.png)
Listen News!