நான் அப்படி சொல்லவே இல்லை.. பகிரங்கமாக ரஜினியிடம் மன்னிப்புக் கேட்ட ஆதவ் அர்ஜுனா.!

நடிகர் விஜய் தலைமையிலான அரசியல் கட்சியான “தவெக”வில் முக்கியப் பொறுப்பில் உள்ளவர் ஆதவ் அர்ஜுனா. சமீபத்தில் அவர் வெளியிட்ட கருத்துகள் அரசியல் மற்றும் ரசிகர் வட்டாரங்களில் பெரும் சர்ச்சையை ஏற்படுத்தியுள்ளன. குறிப்பாக, ரஜினிகாந்த் குறித்து அவர் கூறிய கருத்துகள் ரசிகர்களிடையே கடும் எதிர்ப்பை கிளப்பியது.

கடந்த வாரம் தவெக சார்பில் நடைபெற்ற கண்டன ஆர்ப்பாட்டத்தில் பேசிய ஆதவ் அர்ஜுனா, “ரஜினி சார் கட்சி தொடங்க திட்டமிட்டபோது, அவரை திமுக குடும்பம் மிரட்டி அரசியலுக்கு வரவிடாமல் செய்தது.” என்று கூறினார். மேலும், “ஆனால் எங்கள் தலைவர் விஜய் அப்படியல்ல; அவர் மனவலிமை கொண்டவர். அவர்மீது எத்தனை அவதூறுகள் வந்தாலும், மக்களுக்காக தொடர்ந்து போராடுகிறார்.” என்றும் அவர் பேசினார். இந்தக் கருத்துகள் உடனடியாக சமூக வலைத்தளங்களில் வைரலாகி, ரஜினி ரசிகர்களிடையே கடும் எதிர்ப்பை ஏற்படுத்தின.

ரஜினிகாந்த் ரசிகர்கள், இந்தக் கருத்து அவர்களின் விருப்பமான நடிகரை தவறாக சித்தரிப்பதாகவும், ஆதாரமற்ற குற்றச்சாட்டுகளை முன்வைப்பதாகவும் விமர்சித்தனர். சிலர், இது தேவையற்ற அரசியல் பேச்சு என்றும் கூறினர். இந்த விவகாரம் விரைவில் பெரிதாகி, அரசியல் மற்றும் சினிமா வட்டாரங்களில் பேசப்படும் முக்கிய பிரச்சினையாக மாறியது.

இந்த எதிர்ப்புகளுக்கு மத்தியில், ஆதவ் அர்ஜுனா தனது கருத்தை தெளிவுபடுத்தும் விதமாக சென்னையில் நடைபெற்ற தவெக பிரச்சார கூட்டத்தில் மன்னிப்பு கேட்டார். அவர் கூறுகையில், “நான் ரஜினி சார் மீது நேரடியாக மிரட்டல் நடந்தது என்று சொல்லவில்லை. அவருக்கு எதிராக கீழ்த்தரமான மற்றும் அவதூறான பிரச்சாரங்கள் நடந்ததால், அவர் அரசியலுக்கு வர முடியாத நிலை ஏற்பட்டது என்பதையே குறிப்பிட்டேன்.” என்று விளக்கம் அளித்தார்.

மேலும், “ரஜினி சார் வெளியிட்ட அறிக்கையை பார்த்தபின், நான் கூறிய கருத்துகள் தவறாகப் புரிந்துகொள்ளப்பட்டதாக உணர்ந்தேன். எங்கள் தலைவர் விஜய்க்கும் நீங்கள் தலைவர். என் வார்த்தைகள் உங்களுக்கு வருத்தம் அளித்திருந்தால், அதற்காக நான் பகிரங்கமாக மன்னிப்பு கேட்டுக் கொள்கிறேன்.” என்று அவர் உணர்ச்சிபூர்வமாக தெரிவித்தார்.

இந்த மன்னிப்பு பேச்சு தற்போது சமூக வலைத்தளங்களில் வேகமாக பரவி வருகிறது. சிலர் அவரது மன்னிப்பை வரவேற்றாலும், மற்றவர்கள் இது தேவையற்ற சர்ச்சையை ஏற்படுத்திய பின்னர் வந்த பதில் என்று விமர்சிக்கின்றனர். இதனால், இந்த விவகாரம் இன்னும் விவாதத்திற்குரியதாகவே உள்ளது.

மேலும் சினிமா செய்திகளுக்கு இங்கே அழுத்தவும்

முக்கிய செய்திகள் பிரபலமானவை