• Nov 19 2026

ரேஸ் களத்தில் அஜித்தின் அடுத்த அதிரடி.! 2027 பொங்கலுக்கு AK ரசிகர்களுக்கு சர்ப்ரைஸ்

shali / 2 weeks ago

Advertisement

Listen News!

தமிழ் சினிமாவில் ரசிகர்களால் ‘தல’ என்று அன்புடன் அழைக்கப்படும் நடிகர் அஜித்குமார், தனக்கென மிகப்பெரிய ரசிகர் பட்டாளத்தைக் கொண்டுள்ளார். தன்னை ‘தல’ என்று அழைக்க வேண்டாம் என அவர் கேட்டுக்கொண்டாலும், ரசிகர்கள் இன்றுவரை அவர் மீது கொண்டுள்ள அன்பைக் குறைத்துக்கொள்ளவில்லை. அஜித்தின் திரைப்படங்கள் தொடர்பான அறிவிப்புகள் வெளியானாலே சமூக வலைத்தளங்களில் கொண்டாட்டம் தொடங்கிவிடுகிறது.

இந்நிலையில், சினிமாவைத் தாண்டி கார் பந்தயங்களில் அதிக கவனம் செலுத்தி வரும் அஜித், தற்போது தனது ரேஸ் பயணத்தை மையமாகக் கொண்டு புதிய முயற்சியில் இறங்கியுள்ளார். அதன்படி, ‘கிளாடியேட்டர்’ (Gladiator) என்ற பெயரில் கார் பந்தயம் தொடர்பான ஆவணப்படம் ஒன்றை உருவாக்கியுள்ளார்.

இந்த ஆவணப்படத்தின் ட்ரைலர் சமீபத்தில் திரையரங்குகளில் வெளியிடப்பட்டு ரசிகர்கள் மத்தியில் கவனம் பெற்றதாகக் கூறப்படுகிறது. இதனைத் தொடர்ந்து, இப்படத்தை 2027ஆம் ஆண்டு பொங்கல் பண்டிகையை முன்னிட்டு திரைக்குக் கொண்டுவர முயற்சிகள் நடைபெற்று வருவதாகத் தகவல்கள் வெளியாகியுள்ளன.

மேலும், இந்த ஆவணப்படத்தை இயக்குநர் ஏ.எல். விஜய் இயக்கியுள்ளதுடன், இசையமைப்பாளர் ஜி.வி. பிரகாஷ் இசையமைத்துள்ளதாகக் கூறப்படுகிறது. இதனால், இப்படத்தின் மீதான எதிர்பார்ப்பு அதிகரித்துள்ளது.

திரையில் மட்டுமின்றி, கார் பந்தயக் களத்திலும் தனது திறமையை வெளிப்படுத்தி வரும் அஜித்தின் பயணத்தைப் பெரிய திரையில் காண ரசிகர்கள் ஆவலுடன் காத்திருக்கின்றனர். 2027 பொங்கலுக்கு இந்த ஆவணப்படம் வெளியாகுமா என்பதைப் பொறுத்திருந்து தான் பார்க்க வேண்டும்.

Advertisement

Advertisement