பிரபல நடிகரின் குரலை மிமிகிரி செய்துதான் சிவகார்த்திகேயன் பிரபலமானாரா..! அவரே கூறிய தகவல்

விஜய் டிவியில் கலக்கப்போவது யாரு என்ற நிகழ்ச்சியில் போட்டியாளராக பங்கேற்ற சிவகார்த்திகேயன் இன்று தமிழ் சினிமாவில் முன்னணி நடிகராக கலக்கிக்கொண்டிருக்கின்றார். டிவி நிகழ்ச்சிகளில் தொகுப்பாளராக இருந்த சிவார்த்திகேயன் மெரினா படத்தின் மூலம் இயக்குனர் பாண்டிராஜால் அறிமுகமானார்.

மேலும் அதைத்தொடர்ந்து எதிர்நீச்சல், வருத்தப்படாத வாலிபர் சங்கம், மான் கராத்தே, ரெமோ என தொடர் வெற்றிகளின் மூலம் முன்னணி நடிகராக உயர்ந்தார். இந்நிலையில் கடந்தாண்டு சிவகார்த்திகேயன் நடிப்பில் வெளியான டாக்டர் திரைப்படம் நூறு கோடி வசூல் செய்து பெரிய சாதனை படைத்தது.

அதைத்தொடர்ந்து தற்போது சிவகார்த்திகேயன் நடித்துள்ள டான் திரைப்படம் வெளியாகவுள்ளது. சிபி சக்கரவர்த்தி இயக்கத்தில் உருவான இப்படத்தில் எஸ்.ஜெ.சூர்யா முக்கியமான கதாபாத்திரத்தில் நடிக்க அனிருத் இப்படத்திற்கு இசையமைத்துள்ளார்.

மேலும் இப்படத்தின் பாடல்கள் ரசிகர்களின் அமோக வரவேற்பை பெற்றதாலும், சிவகார்த்திகேயனின் முந்தைய படமான டாக்டர் படத்தின் வெற்றியினாலும் ரசிகர்களிடம் இப்படத்தின் மீதான எதிர்பார்ப்பு அதிகரித்துள்ளது என்று தான் கூற வேண்டும்.

இந்நிலையில் சமீபத்தில் சிவகார்த்திகேயன் எஸ்.ஜெ.சூர்யாவுடன் நடித்த அனுபவத்தைப்பற்றி பேசியுள்ளார். அதில் அவர் பேசியதாவது, நான் கல்லூரி நாட்களில் எஸ்.ஜெ.சூர்யாவின் குரலில் தான் அதிகம் மிமிகிரி செய்வேன். மற்ற கல்லூரி விழாக்களில் எஸ்.ஜே.சூர்யா குரலில் பேசி காட்டி பரிசுகளை வென்றுள்ளேன்.

அத்தோடு எஸ்.ஜெ.சூர்யா குரலில் மிமிகிரி செய்தே மற்ற கல்லூரிகளில் பிரபலமானேன். அதைத்தொடர்ந்து நான் ஜோடி நம்பர் ஒன் நிகழ்ச்சியில் போட்டியாளராக பங்கேற்றபோது எஸ்.ஜெ.சூர்யா நடுவராக இருந்தார். அப்போதும் அவரின் குரலில் அவர் முன் பேசிக்காட்டியுள்ளேன்.

இந்நிலையில் தற்போது அவருடன் டான் படத்தில் நான் இணைந்து நடிப்பது எனக்கு மிகவும் பெருமையாக உள்ளது. படத்தில் அவரது நடிப்பை பார்த்து நான் வியந்து அவரை பாராட்டியுள்ளேன் என்றார் சிவகார்த்திகேயன். சிவகார்த்திகேயன், எஸ்.ஜெ.சூர்யா, ஷிவாங்கி என பலர் நடித்த டான் திரைப்படம் மே 13 ஆம் தேதி வெளியாகவுள்ளமை குறிப்பிடத்தக்கது.