நாளைய தினம் வெளியாக உள்ள 4 திரைப்படங்கள்...!எது வெல்லும்? எது தோல்வி அடையும்?

ஒவ்வொரு வெள்ளிக்கிழமையும் தமிழ் திரையுலகில் புதிய திரைப்படங்கள் வெளியாவதை நாம் வழக்கமாக பார்த்திருக்கிறோம். ஆனால், அனைத்து படங்களும் வெற்றி பெறும் நிலை இல்லை. கடந்த வாரம் (செப்டம்பர் 13) மட்டும் 10 திரைப்படங்கள் வெளியானது. பாம், பிளாக் மெயில், குமார சம்பவம், தணல், காயல், அந்த 7 நாட்கள் உள்ளிட்ட திரைப்படங்கள் எதிர்பார்ப்பை ஏற்படுத்தத் தவறின. இந்த நிலையில், நாளை செப்டம்பர் 19 ஆம் தேதி, மேலும் 5 திரைப்படங்கள் திரையரங்குகளில் வெளியாக இருக்கின்றன.

ரசிகர்கள் அதிக எதிர்பார்ப்புடன் காத்திருக்கும் படம் 'சக்தி திருமகன்'. விஜய் ஆண்டனி முக்கிய கதாபாத்திரத்தில் நடித்திருக்கும் இப்படத்தை, 'அருவி' மற்றும் 'வாழ்' புகழ் அருண் பிரபு இயக்கியுள்ளார். இது ஒரு ஆக்ஷன் திரில்லர் வகை படம். ட்ரெய்லர் வெளியானதும் நல்ல வரவேற்பை பெற்றுள்ளதால், திரைப்படம் ரசிகர்களின் எதிர்பார்ப்பை பூர்த்தி செய்யும் என நம்பப்படுகிறது.

நடிகர் கவின் நடித்துள்ள ‘கிஸ்’ திரைப்படம் ஒரு ரொமான்டிக் காமெடி வகை படமாக உருவாகியுள்ளது. இந்த படத்தில் ப்ரீத்தி அஸ்ரானி நாயகியாக நடித்திருக்கிறார். நடன இயக்குனராக பரிச்சயம் உள்ள சதீஷ் கிருஷ்ணன் இப்படத்தின் இயக்குனராக அறிமுகமாகிறார். கவினுக்கு இதற்கு முந்தைய படம் ‘பிளடி பெக்கர்’ தோல்வியடைந்த நிலையில், இந்த படம் அவரது திரும்பிப் பெறும் முயற்சி எனக் கருதப்படுகிறது.

‘உலகப் போரில் கடைசி குண்டு’ படத்தை இயக்கிய அதியன் ஆதிரை இயக்கியுள்ள புதிய திரைப்படம் ‘தண்டகாரண்யம்’. இந்த படத்தில் கெத்து தினேஷ், கலையரசன், ரித்விகா உள்ளிட்டோர் நடித்துள்ளனர். பா.ரஞ்சித்தின் உதவியாளராக இருந்த அனுபவம் கொண்ட இயக்குநர், சமூக அரசியல் கருப்பொருளோடு கூடிய கதைமொழியை இந்தப் படத்தில் முன்வைக்கிறார். விமர்சகர்கள் முன்னதாகவே படத்தை பாராட்டி உள்ளனர்.

மனோஜ் கார்த்திக் இயக்கியுள்ள ‘திரள்’ படத்தில் ரவி பிரகாஷ், யுவன், மயில்சாமி உள்ளிட்டோர் நடித்துள்ளனர். இதில் ஒரு சமூக விழிப்புணர்வை அடிப்படையாகக் கொண்டு கதை உருவாக்கப்பட்டுள்ளது என கூறப்படுகிறது. இயக்குநர் கௌதமன் இயக்கி நடித்துள்ள ‘படையாண்ட மாவீரன்’ திரைப்படம், வரலாற்று பின்னணியில் உருவாக்கப்பட்டுள்ள படமாகக் கூறப்படுகிறது.

இந்த ஐந்து திரைப்படங்களில் 'சக்தி திருமகன்', 'தண்டகாரண்யம்', 'கிஸ்' ஆகியவை அதிக எதிர்பார்ப்பை ஏற்படுத்தியுள்ளன. கடந்த வாரம் எந்தப் படமும் வெற்றி பெறாத நிலையில், இந்த வார வெளியீடுகள் தமிழ் திரையுலகில் ஒரு நம்பிக்கையைக் கொடுக்குமா என்பதை பொறுத்திருந்து பார்க்கலாம்.

மேலும் சினிமா செய்திகளுக்கு இங்கே அழுத்தவும்

முக்கிய செய்திகள் பிரபலமானவை